بـالـيرينـا

حنان شاهين*

باليرينا بترقص
 فى مساحة متر × متر
محتاجة براح
علشان تنفض عن جناحيها الخوف
و تطير 
محتاجه ايقاع
 علشان تستكمل رقصتها
 تحاكي الفلك الساير في دواير
وتكون فكرتها
 عن معنى الدور المسند ليها
 ازاي الروح دبت فيها
برغم الموت المعلن من حواليها
باليرينا بترقص في تحدي
ومصره تكمل رقصتها
وما فيش جمهور
وما فيش غير بس 
شعاع من نور
وموسيقى بتتردد جواها
يتخلق سرب من البجعات البيضا معاها 
ترقص و تدور 
 يا دوبك بس
تلامس طرف الارض بخفه
فـ كأن قانون الجذب 
استسلم من فرط الرقه
ترقص و تدور
وتضم بخفه جناحيها
وتطلع من دانتيل احلامها
ورود و وزهور
تفتح برحابه كفيها
 ترش جهامة هذا العالم 
بالفراشات
تتحايل على ضيق المسافات
وعلو السور
 بـالـرقص
فــ تحن عليها عيون الشمس
وتسرسب ليها شعاع من نور
يبدأ وياها رقصة فالص
    ترقص و تدور
وليلاتي تصحي الصوت 
الهامس جواها
  تعيد الكرًه
وكأنها نجمه وحيده
في قلب مجره
وكأنها نقطة ضي
في عتمة هذا الكون                                 
 
* شاعرة من مصر